Finalizimi i projektit Zero-C e financuar nga Erasmus+

Universiteti “Aleksandër Moisiu” Durrës ka përfunduar me sukses vitin e parë të zbatimit të projektit Zero-C, një iniciativë e financuar nga Erasmus+, e cila synon përgatitjen e specialistëve të aftë për industrinë detare dhe institucionet qeveritare në fushën e dekarbonizimit dhe logjistikës së qëndrueshme. Ky projekt po sjell ndryshime të rëndësishme në kurrikulën mësimore, duke krijuar mundësi të reja për studentët dhe profesionistët.

Gjatë vitit të parë të implementimit, janë modernizuar programet e Mekanikës Detare, Navigacionit dhe Menaxhimit Detar, si dhe të Logjistikës dhe Sigurisë Detare, duke i përshtatur ato me kërkesat e tregut. Një hap i rëndësishëm ka qenë edhe vlerësimi i aftësive të kërkuara nga sektori privat, duke ndihmuar në përafrimin e arsimit me nevojat e industrisë.

Një tjetër arritje e madhe është trajnimi i stafit akademik me metoda të reja mësimore dhe përdorimin e teknologjisë digjitale në sektorin detar. UAMD është pajisur me simulatorë modernë, si simulatori Dual Fuel dhe ai i Logjistikës për optimizimin e operacioneve detare, të cilët kanë ndihmuar në zhvillimin e kurseve më të avancuara dhe përmirësimin e cilësisë së mësimdhënies. Për të mbështetur këtë transformim, janë blerë pajisje moderne laboratorike, duke ofruar kushte më të mira për studentët.

Në të ardhmen, Zero-C synon të zgjerojë ndikimin e tij duke:
-Përmirësuar më tej kurrikulat e programeve të studimit të lidhura me sektorin detar.
-Krijuar trajnime për përdorimin e karburanteve alternative, të cilat do të jenë thelbësore për industrinë detare në të ardhmen.
-Forcuar lidhjet me sektorin privat, duke shndërruar Shqipërinë dhe rajonin në një qendër të rëndësishme për transportin detar të qëndrueshëm.