Takimi përmbyllës i projektit kërkimor mbi emetimet e CO₂ në kompleksin portual Durrës–Porto Romano

 

Në Autoritetin Portual Durrës u zhvillua takimi i fundit i projektit kërkimor “Emetimi i CO₂ nga operatorët portualë dhe impakti i tij në kompleksin portual Durrës–Porto Romano”, në bashkëpunim me Universitetin “Aleksandër Moisiu” Durrës dhe me mbështetjen e Agjencisë Kombëtare të Kërkimit Shkencor dhe Inovacionit (AKKSH), i nisur në janar të vitit 2023.

Studimi evidenton ndikimin e aktiviteteve portuale në përqendrimin lokal të CO₂ dhe thekson rëndësinë e ndërmarrjes së masave për reduktimin e emetimeve, përmes modernizimit të teknologjisë dhe zbatimit të  praktikave të qëndrueshme.

Ky projekt përfaqëson një hap të rëndësishëm drejt zhvillimit të porteve më të gjelbra dhe lidhet ngushtë me iniciativat për dekarbonizimin e sektorit detar, përfshirë edhe projektin ZeroC, i cili synon promovimin e zgjidhjeve me emetime zero dhe tranzicionin drejt transportit detar më të pastër dhe më të qëndrueshëm.