Fakulteti i Shkencave Politike dhe Juridike mirëpriti sot me entuziazëm nxënësit e shkollave 9-vjeçare “Shaqe Mazreku” dhe “14 Nëntori” të Durrësit në një vizitë studimore të organizuar me qëllim frymëzimin e brezit të ri dhe lidhjen e tyre me botën akademike.
Gjatë kësaj vizite, nxënësit patën mundësinë të njihen nga afër me historinë dhe misionin e Universitetit të qytetit të tyre, si edhe me programet e shumta të studimit që ofron Fakulteti i Shkencave Politike dhe Juridike. Ata mësuan për mënyrën e funksionimit të fakultetit, rëndësinë e arsimit të lartë dhe mundësitë që ofrohen për zhvillimin profesional të studentëve.
Vizita përfshiu ture të organizuara në auditoret e fakultetit, zyrat e lektorëve dhe hapësirat administrative. Nxënësit shfaqën kureshtje dhe entuziazëm, duke bërë pyetje dhe duke marrë pjesë aktive në diskutime mbi jetën universitare dhe botën akademike. Në përfundim të vizitës, u hodhën ide për organizimin e leksioneve të hapura të përshtatura për ta, si një hap i mëtejshëm për të nxitur pasionin e tyre për dijen.
Ky aktivitet u moderua nga lektoret Dr. Mirela Metushaj dhe Dr. Dorina Gjipali, të cilat udhëhoqën me përkushtim dhe profesionalizëm këtë eksperiencë edukative dhe frymëzuese për fëmijët e komunitetit tonë. Kontributi i tyre ishte thelbësor për të krijuar një atmosferë të ngrohtë dhe motivuese.
Nëpërmjet aktiviteteve të tilla, Universiteti Aleksandër Moisiu Durrës vazhdon të përmbushë misionin e tij për të frymëzuar brezat e rinj dhe për të ndihmuar në ndërtimin e një të ardhmeje më të mirë për komunitetin. Ne jemi krenarë për brezin e ardhshëm të qytetarëve të Durrësit dhe për rolin e rëndësishëm që ata do të kenë në përmirësimin e jetës në komunitetin tonë.
Albanian 
English