Në një atmosferë të mbushur me emocion dhe gëzim, Universiteti “Aleksandër Moisiu” Durrës (UAMD) shënoi dje përfundimin e një udhëtimi të suksesshëm për 2243 studentë të diplomuar në programe të ndryshme studimi. Rektori i UAMD-së, Prof. Dr. Shkëlqim Fortuzi, mbajti një fjalim emocionues, duke shprehur krenarinë e institucionit për arritjet e studentëve dhe për përgatitjen e tyre të shkëlqyer për sfidat e ardhshme.
Në fjalën e tij, Rektori theksoi rëndësinë e këtij momenti jo vetëm për studentët, por edhe për gjithë stafin akademik, duke theksuar rolin e rëndësishëm që UAMD luan në formimin e profesionistëve të rinj që do kontribuojnë në shoqëri.
“Tashmë, 2243 studentë të rinj po i hyjnë me guxim rrugës së jetës, të përgatitur akademikisht dhe profesionalisht për të dhënë kontributin e tyre në të gjitha sferat e jetës, duke filluar nga tregu i punës e deri tek zhvillimi i komuniteteve tona,” u shpreh Prof. Dr. Fortuzi.
Ai iu drejtua studentëve të sapodiplomuar me një mesazh frymëzimi, duke theksuar se diploma e tyre është dëshmi e fortë e vullnetit, këmbënguljes dhe disiplinës, që do t’i udhëheqë ata në rrugën e mëtejshme drejt suksesit. “Jini krenarë për suksesin tuaj dhe për përgatitjen tuaj akademike e profesionale. Kjo diplomë është vetëm fillimi i një rruge të re, ku sfidat dhe mundësitë do jenë të pafundme,” theksoi ai.
Ceremonia e diplomimit shënonte gjithashtu një moment reflektimi për UAMD, që, sipas rektorit, është një mundësi për të parë arritjet e vitit akademik që lamë pas dhe për të planifikuar strategjitë për të ardhmen. “Për ne, ky është një moment krenarie dhe një përgjegjësi për të vazhduar investimin në rritjen e cilësisë së arsimit dhe formimin e brezave të ardhshëm të profesionistëve,” përfundoi Prof. Dr. Fortuzi.
Rektori përmbylli fjalimin me një urim të përzemërt për të gjithë studentët, duke shprehur besimin e tij se ata do të shkëlqejnë në të ardhmen dhe do të jenë krenaria e UAMD-së dhe e vendit.
“Urime të gjithë të diplomuarve! Ju jeni krenaria jonë dhe ne jemi të bindur që do arrini shumë suksese në rrugën që keni përpara!”
