Në cilësinë e Koordinatores së Programit Chevening pranë Ambasadës Britanike në Tiranë, kam kënaqësinë të ndaj me ju se aplikimet për bursat Chevening për vitin akademik 2026–2027 janë të hapura deri më 7 Tetor 2025.
Çfarë është Chevening?
Chevening është një program prestigjioz i qeverisë së Mbretërisë së Bashkuar, i cili ofron bursa të plota për studime Master njëvjeçare në universitete britanike. Programi mbështet individë me potencial lidershipi, vizion dhe përkushtim për zhvillimin e vendit të tyre.
Përfitimet kryesore të bursës përfshijnë:
Mbulesë të plotë të tarifës së shkollimit dhe shpenzimeve të jetesës në Mbretërinë e Bashkuar;
Mundësi rrjetëzimi me profesionistë dhe liderë ndërkombëtarë;
Qasje në një komunitet global me mbi 60,000 alumni Chevening (përfshirë mbi 270 nga Shqipëria).
Kriteret kryesore për aplikim:
Të keni përfunduar arsimin e lartë (Bachelor);
Minimumi 2 vite përvojë pune;
Njohje shumë e mirë e gjuhës angleze;
Potencial për lidership dhe përkushtim për zhvillimin e Shqipërisë.
Thirrje për bashkëpunim me universitetet
Duke qenë se universitetet luajnë një rol kyç në edukimin e liderëve të së ardhmes, inkurajojmë promovimin e kësaj mundësie tek studentët, stafi akademik dhe rrjetet profesionale.
📌 Për më shumë informacion dhe për të aplikuar, vizitoni:
👉 https://www.chevening.org/scholarship/albania/
English 
Albanian